Østerbø Maskin as

Elektromekanisk industri
Maskinforretning
Autorisert el-installatør
Industrivedlikehald

Historie/utviklinga til Østerbø Maskin as:
1970-1979
1974 Første del av verkstaden vart bygd og ein del utstyr kjøpt inn. Hovudsakleg til eige bruk i gardsdrifta. Det vart og ein del arbeid for naboar med vedlikehald og service. Men sidan det var lite med vegforbindelsane vart det ikkje så stor kundemasse, og omsetninga vart heller låg.	1976 I 1976 vart vegen til Bjordal opna og året etterpå brua over Ikjefjorden. Då vart kundegrunnlaget noko heilt anna og omsetninga auka med over 100% kvart år. 1977 I 1977 registrerte eg meg i meirverdiavgiftsregisteret og handelsregisteret i ytre Sogn.
1980-1989
1981 I 1981 tilsette eg den første medarbeidaren, og omsetninga runda ein million. 1982 Me gjekk til innkjøp av den første servicebilen, før var det privatbilen som vart brukt. 1983 Firmaet skifta namn frå Arne Østerbø Reparasjonsverkstad til Østerbø Maskin.	1985-1987 I 1985 begynte me å planlegge nybygg, og i 1987 hadde me planane klare med et bygg på 500 kvm til ein kostnad på vel 2 mill. Men på grunn av at dei økonomiske utsiktene begynte å sjå dårlege ut, vart desse planane lagt på is. 1988 Me kjøpte 11 anleggsbrakker som me monterte saman med skikkeleg tak, desse vart brukt til kontor, butikk, lager og personalrom. Etter dette hadde me ca. 450 kvm under tak, med tillegg av lagerskur på "Røysa" på 180 m2. 1989 Etter innflyttinga i 1989 vart det innkjøpt dataanlegg (Pengvin) og diverse kontorutstyr, slik at bedrifta fekk eit meir proffesjonelt preg.
1990-1999
1993 Dataprogrammet vart utskifta til «Multisoft» noko som var ei stor forbetring, med mulegheit for lagerstyring og struktur for produksjonsstyring. 1994 Kvalitetssikring i samsvar med ISO 9002 vart starta opp. Dette i regi av Høyanger Næringsutvikling og Hydro Aluminium. Dette vart gjennomgått av Hydro og funne tilfredstillande. Internkontroll / HMS er innbakt i kvalitetssikringa med eige kapittel / arbeidsperm. 1996 I 1996 blei me med på FRAM, eit prosjekt i regi av SND og Teknologisk Institutt. Prosjektet er eit leiar og strategiprogram som gjekk kontinuerlig i 2 år. Kreativt mål var 5% av betra årsresultat i % av driftsinntekter, me greidde ca 6%, så det var ei god investering. Me omorganiserte firmaet til as, og starta arbeidet med å bygge ny verkstad som skal hjelpe oss å effektivisere arbeidet vårt. 1997 Januar 1997 flytta me inn i ny verkstad og kontor, dette hadde mykje å seie for arbeidsmiljøet då det var veldig trongt der me var. Me har no ca 400 m2 isolert verkstad og ca 350 m2 kaldlager i det nye verkstadsbygget. Vidare er det ca 120 m2 med kontor / butikk knytt opp mot gamle butikken. Totalt ca 1200 m2 med det gamle. Me gjekk til innkjøp av ein del større maskiner. Platesaks, Kantpresse for stålplater, valse og diverse anna spesialverktøy, så no kan me ta på oss meir avanserte jobbar. Pr. desember 1997 er me 9 tilsette, dei fleste med fagbrev og diverse sertifikat. Mellom anna: sveisesertifikat, sakkyndig løfteutstyr, kranførar, meisterbrev kjølemontør, el-reparatør.	1998 I mars vart installasjonsfirmaet Ing. Åge Førde oppteke i vårt firma. Ing. Åge Førde vart deltidstilsett som Installatør gr L, og me fekk autorisasjon som el-installatør, dette med tanke på at me no kan tilby totalvedlikehald til industrien og andre, både mekanisk, kjøleteknikk, røyrlegging, automasjon og elektrisk. Pr. mars 1998 er me 12 tilsette fordelt på ca 10 årsverk. Grunna stadig vekst var det på tide med tydeleg ansvarsfordeling og organisering . Verkstadformannen fekk fullt ansvar for at alle på verkstaden har arbeid, bestiller reservedeler og har ansvaret for tilboda på prosjekter. Butikksjefen står for sal og kundebehandling, lagersjefen bestiller inn og har ansvaret for lagerstyringa osb. Dette verka godt, omsetninga auka så me greidde eit lite overskot for første gang sidan nybygget var ferdig. 1999 I januar melde me oss inn i bedriftshelsetenesta og arbeidde med å oppdatere HMS programmet. I september omorganiserte me firmaet igjen, fordeling av ansvar vart forandra. Steinar Holen er tilsett som driftsansvarleg med totalansvar for dagleg drift, fordeling av jobbar og utarbeiding av tilbod. Arne Olav Østerbø er framleis dagleg leiar, med hovudansvar for HMS, det er og andre mindre forandringar.
2000->
2000 Året starta med stor pågang på arbeid, me har allreie vokse ut av nybygget frå 1997, og er i ferd med å planlegge utviding. 1. mai er me 16 tilsette fordelt på ca 15 årsverk. Me innleia eit samarbeid med Backer as i Bergen for produksjon og montering av utstyr for fiskeoppdrettsflåtar. Imars selde Arne Olav Østerbø mjølkekvoten og la ned gardsdrifta i ordiner form (10 mjølkekyr), så no er det meir tid til Østerbø Maskin as. I august kjøpte me inn 3 brakker som me sette saman og brukte til førebels garderobe og matrom fram til nybygget står ferdig. Dette vart omtrent det doble i areal av det me hadde før. Me er pr. 1. september 18 tilsette fordelt på ca 17 årsverk. 11 oktober hadde me møte med SND, Sparebanken, og Høyanger næringsutvikling for å diskutere vidare planer. SND-søknad vart send i årsskiftet 2000/2001 2001 Me innleia i 2001 eit samarbeid med Himoinsa i Spania for import av strømaggregat, då vi ikkje lenger greier å konkurrere med å bygge dei sjølv. Februar - mars utvida me området bak verkstaden og forsterka forbygginga mot elva, som ei tilrettelegging til nybygging. Juni starta me med grunnarbeidet og betong for ny sveise- og monteringshall på 400 m2, og i slutten av august var taket tett. Dette bygget er parallelt med eksisterande bygg, og skal i tillegg innehalde eit enkelt formannskontor og toalett. Oktober stod bygget ferdig, og me søkte etter fleire medarbeidarar. Me har no ca 1600m2 eige areal under tak, og leiger ca. 400 i tillegg. 2002 Dette året inngjekk me avtale med Ausa i Spania for import av firehjulsdrevne gaffeltruckar. 2002 og 2003 vart to tøffe år. Det var nedgang i fiskeprisane, Bjordal Sandindustri, Feeding Systems, Fundo og diverse andre bedrifter fekk betalingsproblem og nokre gjekk konkurs, og vi tapte mykje pengar. Dette resulterte i at me fekk problem med å betale våre leverandørar. 2003 Men det var og lyspunkt, me fekk mykje arbeid med utbygginga på Fundamus as frå sommaren 2003, og me fekk tilskot frå SND og HNU til å utvikle ein båtheis for privatmarknaden, i samarbeid med Coast Innovation as. 2004 Me overtok importen av maskiner og utstyr frå Reform i Austerrike etter BS maskiner i Førde som gjekk konkurs i 2003.	2005 I 2005 innleia me et samarbeid med Marine Control i Bergen for bygging av utstyr for fiskeoppdrettanlegg. Åge Østerbø bestod installatørprøven så no er me el-installatør ved hjelp av eigne folk. I lag med Overflateteknikk as og Statoil utvikla me ein renseunit for bruk på prosessutstyr på oljeplattformar. Me har og innleia samarbeid med Sunnfjord engineering as for produksjon av sertifiserte konstruksjonar i aluminium for løft på oljeplattformer. Dette året stramma arbeidsmarknaden seg til so me såg oss nøydd til å tilsette den første polske medarbeidaren, då marknaden var støvsuga, spesielt etter sveisarar. Me blei etterkvart so mange tilsette at vi måtte utvide brakkeriggen for kantine og garderobe, den er no på ca 115m2. Me har innført tøfler og "svenske verneskor" inne, så standaren er heva betrakteleg. Vi har i dei siste ti - femten åra servert lunch til alle tilsette, gjerne med ein liten varmrett når det passa. 2006 Me vart i 2006 pre-kvalifisert i Achilles for leveransar til oljeindustrien, frå før var me godkjent i Sellihca som er det same for energiverka. Me har og søkt og blitt godkjent i Startbank som er for leveransar til anleggsindustrien. Me hadde tre mann på sikkerheitskurs for offshore, og har avtala serviceavtale med Overflateteknikk as om service og delelager for renseunitane og klargjer dei med all sertifisering og godkjenningar før dei blir utsende. Så no har vi ein fot innom offshore. Me har kjøpt tilgang til Qm+ som er eit webbasert kvalitetsstyringssystem som vi ventar oss mykje av. Og me har starta oppkøyringa til å bli sertifisert i ISO 9000 systemet. I 2006 starta eit samarbeid med bygging av prototype av livbåtdavit og livbåtvinsj for store ferjer og cruiseskip, i den samanheng fekk me tilskot for bygging av testtårn. Dette kan og brukast til alt offsoreutstyr som skal testast etter DNW 2.7-1 standaren. Tårnet er 14 m høgt og kan teste inntil 400 tonn. Me innleia og eit samarbeid med Wergeland Halsvik i Sløvåg med el-installasjon i eit nytt forbrenningsanlegg for oljeslam frå nordsjøen. Det ser ut som dette samarbeidet utvikla seg positivt for det er meir arbeid og levering der. Utearealet har stadig vorte utvida. I år begynte vi på området aust for vegen med å legge rør, kummar og planere. Vi har hatt eit godt samarbeid med NCC, bygde kai på Mongstad, hadde mykje arbeid i forbindelse med vannrenseanlegg på Svartediket i Bergen. Og i 2007 ei større utbygging på Håkonsvern. 2007 Pr 01.01.07 er me 28 tilsette fordelt på 24 årsverk, 4 kvinner og 6 polske medarbeidarar. Og eg føler at me no er kommen til det stadiet som er beskrive i siste setninga i forretningsideen. At me blir foretrekt om vi ikkje alltid er billegast. Dette takka vere flinke medarbeidarar som står på minst det doble av det ein kan forvente. I april var Arne Olav Østerbø til Kina og besøkte 5 messer i løpet av to veker. Dette har resultert i at vi vurderer eit samarbeid med div. kinesiske selskap Våren 2007 stod 7 mål industriområde klart, og vi kontakta bank og HNU for å få finansiert vidare bygging. Vi har i nokre år hatt tankar om å utvikle resirkulering av vatn i fiskeoppdrettsanlegg, dette prøver vi å få konkretisert igjennom eit forprosjekt som vi søker tilskott til i 2007. Vi har i 2007 30 års jubileum frå vi vart registrert i MVA registeret den 19 april 1977.

Design: KristinMy